首頁 » 專訪論談 » 專欄 » 劉重義講堂 » 【劉重義講堂】阿里山瑞里二日遊

【劉重義講堂】阿里山瑞里二日遊

by 望小風

文 / 劉重義
(編者:請用台語讀)

望春風文化藝術基金會董事長陳秀麗,舊年要搬去高雄之時,阮辦公室開一個歡送會,送伊一支「打狗棒」,希望伊南下認真去摃狗。結果,伊去開一間「無穹旅行社」,不時在人面冊秀自己四界導人遊山玩水。董事長兼車掌閣兼摃鐘,有夠認真。

阿里山瑞里二日遊

阿里山瑞里二日遊

前禮拜,陳秀麗拍電話來講,阿里山櫻花大開非常媠,所以,伊招一團阿里山瑞里賞花一日遊,參加人數真踴躍,已經著愛開三隻車,李鴻禧教授夫婦和楊維哲教授夫婦攏要去,問我看咁要去。我應講,若一日趕鴨仔式的旅遊,我無趣味,至少二日才要去。結果,一點鐘後,伊閣拍電話來講,已經改做二日遊,3月15早起8點半在嘉義高鐵站出發到隔日暗時8點半嘉義高鐵站解散。這個女強人效率實在有夠高。

2021瑞里紫藤花季

2021瑞里紫藤花季

3月15透早對台北搭高鐵到嘉義站集合,包括陳秀麗領隊和三個司機總共27個人,分三隻9人座的旅行車,座位夠闊相當爽快。因為阿里山的櫻花已經過時,所以這次旅遊重點置在欣賞瑞里鄉的紫藤花和梅山區高山茶園。在日本,賞櫻花當然是第一大賞花盛事,賞紫藤花嘛是真熱。不過,對花對茶我攏外行,咁哪有趣味台灣四界看山水和草地景色。

2021瑞里紫藤花季

2021瑞里紫藤花季

台灣顯然真濟所在有注意著提升在地經濟,包括發展在地觀光。阮第一站著先去就近看太保鄉農民自己種逐大片的日頭花田。續落,去嘉義仁義潭附近的「九重葛秘境」,拄好盛開歸排紅、粉紅、白等色彩的花,大家逐歡喜以九重葛花墻做背景,用手機悽慘翕相。

2021瑞里紫藤花季

2021瑞里紫藤花季

 

在瑞里,紫藤花大概是鄉民要發展的特色。真濟所在攏有種,漸漸有起色。總是,距離展示盛大花景還得努力並耐心等待。總是,旅遊安排的竹林密境以及像世外桃源的德恩亞納部落非常有特色。

隔日3月16早起十點,著有一個「2021瑞里紫藤花季」的記者會,嘉義縣長會來講話,華視和公視的陳郁秀董事長嘛來出席。因為阮彼暝住的民宿是在記者會附近,主辦單位聽著阮這團有一身大佛李鴻禧教授,著特別來邀請阮歸團作貴賓。可惜,隔日阮著趕行程,並無留落來參加。

2021瑞里紫藤花季

2021瑞里紫藤花季

嘉義聽講是台灣種高山茶面積上大的縣。徛上茶園在山頂的看台,看四週真媠的景色,有高高低低的山做背景,頭前展開有自然線條和秩序的青翠茶園,對住市內的人是一種難得的精神享受。尤其,徛在瑞峰海鼠山茶園的看台,看921地震予原來在雲林草嶺的「堀沓山」,「飛」3.5公里過來嘉義縣,形成了大家目睭前的「大飛山」。大自然的力量實在會驚死人。

茶園的頭家嘛攏逐親切,解釋各種茶的做法和特色,嘛泡各種茶招待阮這陣。在彼,咱會發現這幾個經營較成功的茶農,其實相當有現代科學和環保意識。

2021瑞里紫藤花季

2021瑞里紫藤花季

三位司機中間有一位班長,兼負責解釋沿路景物,對荒山地理路況和當地趣味故事攏會當予阮得到知識。來吉鄒族山豬部落的故事值得寫出來,吸引遊客的注意。真可惜,阮經過之時,領隊無吼停車予大家落車翕幾粒畫大隻山豬的石頭。

山豬部落的故事按呢講,來吉鄒族部落內一個叫做阿明的囝仔,伊和一隻山豬變做逐好的朋友。當阿明較大漢,著愛去外地讀冊,伊著將這隻山豬交代爸母好好照顧。有一日,阿明轉來,尋無彼隻山豬起抓狂。原來伊的老爸請朋友來飲酒,卻無夠物配酒,著將彼隻山豬刣來請人客。阿明聽了非常傷心,著將伊看著的石頭畫做山豬來思念伊的朋友。部落的小學老師,聽著阿明的遭遇,真受感動,著和全校的囝仔講這個故事,大家決定要安慰阿明,著合齊將部落內底的石頭攏畫做山豬。所以人著叫這個部落是山豬部落。

2021瑞里紫藤花季

2021瑞里紫藤花季

0 留言
0

您可能感興趣

發表留言 Leave a Comment